Горан Пандев стигна до јубилејот кој го чекаше во Серија А, 100 погодоци во елитата од италијанскиот фудбал, а јубилејот го прослави како двоен стрелец во ремито меѓу Џенова и Беневенто од 2-2. За популарниот Гоче тоа беа петти и шести погодок сезонава, ги постигна само за 10 минути, со кои ѝ обезбеди на Џенова значаен бод во битката за опстанок.
По мечот, Пандев истакна дека прекрасно е чувството да се праслават 100 јубилејни погодоци, но поважно му е што придонесува за екипата да го задржи прволигашкиот статус, а се наврати и на евентуалното пензионирање по крајот на оваа сезона.
„Убав е бројот 100 гола во Италија. Не сум класичен напаѓач кој постигнува многу многу погодоци, често играв и по крилните позиции. Но, поважно е што освоивме бод кој ни е важен да ја оствариме целта. Уште немаме обезбедено опстанок, во сабота продолжуваме со нашата битка“, посочи Пандев за италијанските медиуми и додаде:
„Прво да ја спасиме Џенова, да одам на ЕП со Македонија, па дури потоа ќе размислувам околу пензијата. Ќе се сретнам со управата на клубот и ќе разговараме на оваа тема“, вели Пандев.
Нашиот капитен воедно искористи да му честита на Антонио Конте и неговиот Интер, кој сигурно чекори кон Скудетото.
„Секако дека уште го следам Интер. Му честитам на Конте за работата, се надевам дека ова е добра сезона конечно да ја освојат титулата“, изјави поранешниот офанзивец на Нераѕурите.
