Данска потврди зошто е прв фаворит во групата во која е и Македонија на Европското првенство, откако во второто коло, без големи проблеми ја победи Словенија со 34:23.
Со оваа победа Данска го обезбеди првото место во групата, па дуелот против Македонија ќе им биде како тренинг. Словенците во третото коло, во директен дуел против Црногорците ќе решаваат за второто место и патникот во втората фаза.
Во дербито на второто коло, Хрватска со 23:20 ја победи Србија во Ц групата. Коцкестите по овој триумф сега се во пол позиција за освојување на второто место во групата каде непрокосновена е Франција.
Шпанија ја изненади Шведска и славеше со 32:28 во групата Е, каде Чешка претходно со 27:19 ја победи Босна и Херцеговина.
Најдраматично вечерва беше на дуелот Норвешка – Русија, а на крајот Русите се радуваа со 23:22. Со оваа победа Русите се на чекор од обезбедување на првото место во групата, а во третото коло ќе треба да играат со домаќинот Словачка која денеска славеше над Литванија со 31:26.
