Што се случува со првиот светски рекет? Ѓоковиќ се пожали на мистериозна болест по поразот од Рубљев

Новак Ѓоковиќ немаше енергија во последниот сет од финалето во Белград против Андреј Рубљев, го загуби со 0:6 и мечот со 1:2 во сетови и потоа се пожали на мистериозна болест.

„Вакво нешто никогаш не ми се случило во кариерата. Има сила за првите два гема во последниот сет и потоа комплетно бев исцрпен. Не е корона, но и не сакам да зборувам за деталите. Опасно влијаеше на моето здравје и на организмот. Веројатно ќе морам подолго да одморам, бидејќи истото ми се случи и на турнирот во Монте Карло“, изјави српскиот тенисер.

Тој и се извини на публиката што не успеа да ја освои титулата во Белград, а ги пофали за големата поддршка што му ја даваа во текот на целиот турнир. 

Сега неизвесно е дали Ѓоковиќ ќе успее да се справи со болеста што не откри точно од каков карактер и дали ќе биде максимално подготвен за настап на вториот гренслем во сезоната, на Ролан Гарос во Париз од 22. мај до 5. јуни.