Спектакуларното четвртфинале меѓу Рафаел Надал и Новак Ѓоковиќ е главен настан во светските медиуми, и тоа апсолутно заслужено по битката од 4 часа и 12 минути на „Филип Шатрие“ на Ролан Гарос на двајца блескави тенисери.
„Почнаа во мај, а завршија во јуни“ е насловот на српскиот „Блиц„ за новиот епски дуел на двајцата тениски великани.
Подобар беше Надал, кој е неприкосновен владетел во Париз, на Ролан Гарос. Неверојатна е енергијата на 36-годишниот тенисер, кој имаше здравствени проблеми и претходно се жалеше дека има проблеими со дишењето, а пред четвртфиналето и на повреда на стапалото и најави дека можеби го игра и последниот меч во Париз.
Надал во своето тениско царство има шанса со уште две победи против Зверев во полуфиналето и потоа во финалето да ја освои и 14-тата круна во Париз, а Шпанците и буквално го молат никогаш да не престане да игра тенис.
„Немој никогаш да си заминеш“ е насловот на „Марка“ по брилијатниот меч меѓу Надал и Ѓоковиќ.
Играа по 59-ти пат и сега скорот е 30:29 во победи за Новак, а двајцата се дел од најдобриот и најтрофеен трилинг на тенисери со најмногу гренслем-титули.
Заедно Надал, Ѓоковиќ и Федерер имаат дури 61 гренслем-титула, а ако Рафа победи повторно на Ролан Гарос, ќе има 22, односно две повеќе и од Новак и од Роџер.