Екипата на Македонија ЃП третпат во својата историја е освојувач на трофејот од Купот на Македонија, откако дури после изведувањето на пеналите ја совлада Струга Трим Љум.
Личина и Скендери во втората, односно четвртата серија беа прецизни за Македонија ЃП, што беше доволно за победа од 2-0 на пенали, со оглед на тоа дека Струга Трим Љум ги промаши сите четири пенали!
За Македонија ЃП шутираа уште и Мишевски и Алексовски, но нивните удари ги одбрани голманот на Струга ТЉ, Ведран Ќосевски.
За екипата од Струга лоши пеналџии беа Таири (шутираше над гол), Радески и Незири (двајцата во пречката), Шабани (одбрани Стевковски).
Со ова Македонија ЃП е четвртиот претставник на Македонија во европските фудбалски купови и претстојново лето ќе настапи во Конференциската лига.
Двата погодоци на натпреварот беа постигнати во регуларните 90 минути, по еден во двете полувремиња. Најпрво Македонија ЃП дојде во водство во 28-мата минута преку Филип Мишевски од пенал. Конечните 1-1 ги постави Јусуфи, со голема помош на фудбалерот на Македонија ЃП, Ѓорги Стоилов, во 78-мата минута.
Погодоци немаше во дополнителните два пати по 15 минути.
Победникот на Купот на Македонија четвртипат по ред е решен после изведувањето на пеналите.
