Ракометната репрезентација на Австрија со две победи од два меча си обезбеди место во следната фаза. Австриците во дербито на денот го победија Катар со 28:26. Иако разликата е само два гола, интересно е дека Австриците во ниту еден момент не му дозволија на противникот да има водство.
На полувремето Австрија водеше со 16:14, а во неколку ситуации од вториот дел имаа и четири гола предност. Последен пат со четири разлика водеа 28:24, а во завршницата Катар со два гола само го ублажи поразот.
Покрај Австрија, во оваа група која ќе вкрсти со селекциите од групата во која е Македонија, сигурен патник е и Франција, која немаше милост и со 43:19 го растури Кувајт.
Освен убедливата победа на Франција, убедливи победи имаше и на останатите шест меча кои се играа денеска. Резултати: Италија – Алжир 32:23, Словенија – Куба 41:19, Шпанија – Чиле 31:22, Исланд – Зеленортски острови 34:21, Шведска – Јапонија 39:21, Тунис – Данска 21:32.
