На 70-годишна возраст, денеска во Скопје почина Слободан Вујчиќ-Брацо. Тоа е човекот кој ќе остане запамтен како голем пријател на македонскиот спорт, посебно фудбалот. Во изминативе 20-тина години, Брацо беше спонзор на голем број клубови.
Со Вујчуиќ како главен спонзор, Вардар во 2003 година беше на чекор до влез во групната фаза од Лигата на шампиони. Освен во Вардар, тој помагаше и во клубовите на Цементарница, Македонија ЃП, Работнички, Тетекс, Слога Југомагнат, Еуромилк, Локомотива…
Како претставник на УФА Медиа, а потоа и на СВ-РСА и на Спорт 5, беше застапник на ТВ права на многу мечеви кои ги играа нашите клубови.
Забележлива беше неговата помош и во ракометниот и во одбојкарскиот клуб Вардар. Од првиот натпревар на фудбалската репрезентација на Македонија во Крањ 1993 година ги застапуваше маркетиншките и телевизиските права, а 2004 година ја донираше целокупната опрема на македонските олимпијци на игрите во Атина 2004 година.
Беше голем хуманитарец, носител е на наградата “Мајка Тереза“, Скопје и Македонија ги чувствуваше како своја втора татковина.
