Англичаните вчера ја шокираа „црвената фурија“ во Севилја со триумфот од 3-2. Никој не очекуваше дека избраниците на Луис Енрике толку лесно ќе примат три гола во првoто полувреме, а потоа со два погодоци ќе се спасат од дебакл. Селекторот Енрике го претрпе првиот пораз како предводник на шпанската репрезентација, па разбирливо е дека не беше задоволен.
„Логично ќе беше да ги убиев играчите по ваков настап. Но, јас сакав да ги охрабрам, се трудев да го одржам нивниот дух и да ги потсетам дека сите големи селекции можат да се најдат во ваква ситуација. Знам дека на фудбалерите не им е потребна остра критика за да играат на високо ниво, жал ми е што ги разочаравме фановите. Во првото полувреме бевме навистина лоши, штета што порано не го постигнавме вториот гол“, истакна Енрике по мечот.
Шпанија и покрај поразот, останува прва во групата 4 од сегментот А во Лигата на нациите, а ѝ преостанува гостување во Хрватска против „коцкестите“, натпревар во кој со евентуална победа, ќе го потврди пласманот во плејофот.
„Не е лесно да се биде во група со две селекции кои беа полуфиналисти на последниот Мундијал. Ние и натаму ја контролираме групата, ни преостанува натпреварот против Хрватска, во кој треба да победиме за да го осигураме првото место“, додаде Енрике.
Натпреварот Хрватска – Шпанија е предвиден за следната репрезентативна пауза, односно на 15-ти ноември.
