Давид Алаба не е сигурен дали ќе игра за Баерн Минхен до крајот на својот договор во 2021 година или другото лето ќе ја промени средината. Пред вечерашниот меч од првото коло против Херта Берлин, австрискиот репрезентативец рече дека на Баварците им требаат еден или двајца нови играчи.
„Сезоната е долга и имаме потреба од широк и квалитетен состав. Мислам дека еден до двајца фудбалери треба да стигнат, со што ќе се обезбеди неопходната длабочина во ростерот“, кажа 27-годишниот дефанзивец.
Алаба е третиот по Роберт Левандовски и Мануел Нојер кои рекоа дека им требаат засилувања. Баерн остана без Арјен Робен, Франк Рибери и Матс Хумелс, а ги донесе светските прваци Бенжамен Павар и Лука Ернандес, како и крилото на Интер, Иван Перишиќ, кој е на позајмица.
Баварците се интересираат за Филипе Кутињо и Марио Манџукиќ.
Австриецот има договор до 2021 година.
„Сконцентриран сум само на Баерн, но не знам што ќе се случи следната година. Јас сум играч кој бара нови предизвици. Дали тие се во Баерн или друг тим, не можам да кажам“, додава Алаба.
