Стефан Ристовски вечерва ќе биде во стартната постава на Спортинг за првпат во ерата на новиот тренер на Лавовите, Рубен Аморим, и тоа кај омилениот противник Белененсеш.
Македонскиот репрезентативец не играше на првите два меча откако најскапиот тренер во историјата на Спортинг пристигна во клубот. За Аморим, Лавовите од Лисабон ѝ платија на Брага 10 милиони евра отштета, а тој одлучи Ристовски за почеток да биде резерва.
На третиот меч против Тондела, Стефан играше околу 25 минути, па вечерва од 20.15 часот во Оеирас се очекува да го почне мечот.
Интересно е што Спортинг на последните две гостувања кај Белененсеш успеа да постигне дури 12 гола. Во април 2018 година Лисабонските лавови славеа со 4:3, а една година подоцна во нов првенствен меч го декласираа домаќинот со 8:1.
