Реал Мадрид и Манчестер сити утревечер ќе се соочат во реваншот од плејофот за осминафинале во Лигата на шампионите. Натпреварот во Мадрид ќе го реши прашањето кој од двата европски гиганти ќе обезбеди место меѓу најдобрите 16 екипи во ова елитно натпреварување.
По поразот од 2-3 во првиот натпревар, менаџерот на Манчестер сити, Пеп Гвардиола, изрази песимизам околу шансите на неговиот тим за пласман во следната фаза.
„Можноста да победиме на „Бернабеу’ е многу мала, тоа им е јасно на сите. Не можам да дадам точна проценка, но би рекол дека е под 1%. Причината е едноставна, резултатот од првиот меч не ни одговара. Водевме со 2-1 пет минути пред крајот, но загубивме со 2-3, што ги намали нашите шанси“, изјави Гвардиола.
„Ќе се обидеме да ги искористиме шансите што ќе ги создадеме и ќе видиме до каде тоа ќе нè одведе.“
На прес-конференција зборуваше и тренерот на Реал Мадрид, Карло Анчелоти, кој не се согласува со песимистичките прогнози на својот колега.
„Ајде да бидеме реални, Гвардиола не мисли навистина така. Ќе го прашам пред натпреварот дали навистина верува дека имаат само 1% шанса за пласман. Всушност, сигурен сум дека знае дека шансите му се многу поголеми, што е сосема нормално. Ни ние не сметаме дека имаме 99% шанси. Свесни сме дека имаме мала предност и ќе се обидеме да ја искористиме. Нашата цел е да одиграме на ист начин како во првиот натпревар“, изјави италијанскиот стратег.
