Белоруската тенисерка, Арина Сабаленка, првпат во кариерата дојде до трофејот од САД опен, откако во финалето во Њујорк ја совлада домашната натпреварувачка, Џесика Пегула, со 2-0. За Сабаленка ова е трет грен-слем трофеј во кариерата, откако претходно освои два на Австралија опен, од кој еден беше оваа година.
Двата сета во Њујорк беа крајно неизвесни и завршија со идентични 7-5 во корист на белоруската тенисерка. Во првиот сет Сабаленка имаше водство од 5-2 и се чинеше дека лесно ќе поведе, но Пегула израмни на 5-5. Следуваа пет гејма во корист на Сабаленка, најпрво за 7-5 во првиот сет, а потоа и за водство од 3-0 во вториот.
Американката возврати во иста мера, па ги освои наредните пет гејма за пресврт и водство од 5-3. Кога сите мислеа дека ќе се игра трет сет, белорусинката направи серија од четири гејма и дојде до победата од 7-5.
За Пегула ова беше прво финале на грен-слем турнир, откако никогаш претходно немаше стигнато подалеку од четвртфинале.
