Барселона поднесе официјална писмена жалба до Шпанската фудбалска федерација, изразувајќи незадоволство од судиските одлуки за време на првиот полуфинален меч од Купот на кралот против Атлетико Мадрид, кој го загуби со убедливи 0-4.
Во соопштението, клубот го наведува следното:
Недоследност во дисциплинските одлуки – Барселона критикува непоследователни одлуки во слични ситуации, особено во дисциплинските санкции, што создава впечаток на двојни стандарди и го нарушува принципот на праведност и еднаквост.
Противречни критериуми за игра со рака – Клубот посочува дека интерпретацијата на играта со рака во шеснаесетникот е непоследователна, дури и од исти судии, што создава чувство на произволност и непредвидливост.
Натрупување на значајни грешки – Барселона забележува повторувачки груби судиски грешки низ сезоната, кои во повеќе наврати директно го оштетиле клубот, што влијае на интегритетот на натпреварувањето.
Примената и транспарентноста на ВАР – Клубот изразува сомнежи во правилната употреба на технологијата, особено при спорни одлуки без убедливи технички објаснувања, како и за недостаток на транспарентност во објавувањето на аудиозаписите од ВАР.
Критериуми за преглед на ситуации на монитор – Барселона го поставува прашањето за недостиг на јасни и последовни критериуми кога судиите треба да прегледуваат ситуации на монитор, што создава чувство на несигурност и нееднаквост.
Во својот допис, Барселона инсистира на објавување на сите аудиозаписи од ВАР поврзани со непризнатиот гол на Кубарси и бара воспоставување на етички и дисциплински кодекс за судиите, „не за сопствена корист, туку за добро функционирање на натпреварувањето“.
