На легендарниот стадион „Вембли“ во Лондон денеска ќе се одигра едно од највредните „финалиња“ во светскиот фудбал – финалето на плејофот за промоција во Премиер лигата. Шефилд јунајтед и Сандерленд ќе се борат за последното место кое води во елитата на англискиот фудбал за сезоната 2025/26.
Натпреварот започнува во 16:01 часот по македонско време.
Овој натпревар носи огромен влог – се проценува дека победникот ќе заработи над 220 милиони фунти преку телевизиски права, маркетинг и бонуси.
Шефилд јунајтед во финалето стигна преку доминантна победа од 6-0 во полуфиналето против Бристол сити. Тимот заврши трет во регуларниот дел од сезоната, со импресивни 90 освоени поени. Нивниот најистакнат играч оваа сезона е Густаво Хамер, кој беше прогласен за играч на сезоната во Чемпионшип.
Сандерленд, пак, обезбеди финале по возбудлива победа над Ковентри сити со вкупен резултат од 3-2, благодарение на доцниот погодок на Дан Балард. Тимот заврши на четвртата позиција, а во составот се издвојува младиот Џобе Белингам, брат на ѕвездата на Реал Мадрид, Џуд Белингам.
Шефилд јунајтед ќе настапи без повредениот Тајрис Кембел, а неизвесен е и напаѓачот Кифер Мур. Сандерленд ќе биде ослабен поради повредите на неколку клучни фудбалери, меѓу кои Иан Поведа и Алан Браун.
