Фудбалската репрезентација на Македонија за играчи до 19 години на најдобар можен начин ги отвори квалификациите за Европското првенство. Избраниците на селекторот Тони Јакимоски забележаа победа од 2-0 над домаќинот на турнирот Полска. Со тоа е отворен патот кон следната фаза, т. н. Елитна фаза, каде ќе се пласираат двете првопласирани селекции.
Македонија во водство дојде уште во 12-тата минута преку Никола Величковски, по одличната асистенција на Даниел Марковски.
Нашите момци со паметна играа успеваа да ја сочуваат предноста, но и да зголемат на 2-0 во 70-тата минута со прекрасниот еврогол на Мухамед Елмас.
На првиот натпревар од нашата група, Германија со убедливи 6-0 го победи Казахстан. Токму репрезентацијата на Германија е нашиот следен противник во натпреварот кој ќе се одигра в сабота со почеток во 15:30 часот.
