Хјустон рокитс го одржа победничкиот ритам и во дербито против Бостон селтикс кое го доби со 104:115. Најкорисниот играч од минатата сезона, Џејмс Харден, повторно блескаше и го предводеше својот тим до петти последователен триумф со 42 поени и седум скока. Кризата во Бостон е очигледна, само со една победа во последните шест меча претрпеа пад во Источната конференција, сега се петти на табелата со учинок од 38-26.
Гостите од Тексас на полувремето имаа удобни +22 поени предност (43:65), додека при стартот на третиот период Хјустон оствари и највисоки +28. Кошаркарите на Бостон успеаја да се вратат во игра и во последните 12 минути ја намалија предноста на едноцифрен број поени, меѓутоа немаа доволно време во финишот за сензација.
Покрај Харден, одлична партија одигра и Ерик Гордон, кој заврши со 32 поени и реализирани осум тројки, додека Кајри Ирвинг беше најрасположен играч од редовите на домаќинот со 24 поени и девет скока.
Оклахома Сити тандер се намачи во дуелот со Мемфис гризлис во кој триумфираше со 99:95. Тандерси во составот го немаа Пол Џорџ, па цел товар падна на Расел Вестбрук, но тој не беше на своето претпознатливо ниво, иако реализираше 22 поени.
Гостите го контролираа резултатот во текот на целата средба, но Оклахома во последните три минути направи серија од 13-2, што им овозможи да слават и воедно да ја прекинат низата од четири последователни порази.
Russell Westbrook stops and pops to put the @okcthunder ahead for good! #ThunderUp pic.twitter.com/YbcUkdyCZH
— NBA (@NBA) March 4, 2019
Резултати НБА:
Шарлот хорнетс – Портланд трејлблејзерс 108:118
Бостон селтикс – Хјустон рокитс 104:115
Чикаго булс – Атланта хокс 118:123
ЛА клиперс – Њујорк никс 128:107
Кливленд кавалирс – Орландо меџик 107:93
Детроит пистонс – Торонто репторс 112:107 (по продолжение)
Вашингтон визардс – Минесота тимбервулвс 135:121
Оклахома сити тандер – Мемфис гризлис 99:95
