Реал Мадрид и дефинитивно ја заврши сезоната без ниту еден трофеј откако шпанскиот гигант синоќа беше елиминиран во полуфиналето на Светското клупско првенство. Кралскиот клуб загуби убедливо со 4:0 од Пари Сен Жермен, и тоа во меч на кој францускиот ривал постигна три гола во првите 24 минути.
По мечот, тренерот на Реал, Чаби Алонсо, објасни дека неговиот тим во новата сезона почнува од „нула“.
„Заостанувавме со два гола во првите 10 минути и не можевме да најдеме рамнотежа. Тоа беше болен пораз. Мораме да признаеме дека не бевме на посакуваното ниво против ПСЖ“, рече Алонсо.
Реал не направи никакви значајни промени на полувремето, а тренерот рече дека верува дека неговите играчи ќе имаат шанси за гол пред да направи серија замени на средина од второто полувреме.
„Понекогаш имавме некои недостатоци и понекогаш е добро да ги видиме нашите грешки и да учиме од нив за во иднина“, додаде тој.
Иако горчливиот вкус од поразот ќе остане, Алонсо ги увери навивачите дека подобри работи ќе дојдат следната сезона и не ја исклучи можноста за нови потписи.
„По летната пауза започнуваме нов период, со свежи умови. Сакаме да изградиме тим кој игра како еден, сите играат заедно. Бевме на еден натпревар од финалето и тоа е болно, но да видиме што ќе се случи сега“, потенцираше Алонсо.
