Тренерот на Челзи, Лијам Розениор, е уверен дека клубот ќе открие како неговиот почетен состав за натпреварот од Лигата на шампионите против Пари Сен Жермен во средата протекол на интернет дури осум часа пред почетокот. Составот кружел на социјалните мрежи по објавата на еден француски новинар и вклучувал потврда дека на голот наместо Роберт Санчес, ќе застане Филип Јоргенсен.
Одлуката се покажала како кобна бидејќи Јоргенсен направи грешка при резултат 2-2, подарувајќи му водство на ПСЖ, по што парижаните со уште два гола стигнаа до убедлива победа од 5-2, веројатно решавајќи го прашањето за пласман во четвртфиналето.
По натпреварот и тешкиот пораз, Розениор изјави дека не бил свесен за протекувањето на информациите.
„Не знаев за тоа“, рече тој откако дозна дека составот бил познат уште од пладне.
„Сигурен сум дека ќе откриеме што се случило, ако тоа е точно. Такви работи денес се случуваат навистина често“, додаде тој. „Мене повеќе ме загрижува конечниот резултат отколку почетокот на натпреварот.“
Додека Челзи оваа сабота ќе мора да се соочи со Њукасл во Премиер лигата, ПСЖ ќе има слободен викенд. Францускиот шампион успешно ја одложи својата првенствена средба за да се подготви подобро за реваншот од осминафиналето на Лигата на шампионите на „Стемфорд бриџ“ следниот вторник.
