Македонија утре, од 18 часот ќе игра против Хрватска во дерби-дуелот од групата Б во третото коло на Светското ракометно првенство. По првите два меча, Македонија и Хрватска се со максимални 4 бодови. Селекторот на „коцкестите“, Лино Червар, вели дека мечот против нашите ракометари ќе биде клучен.
„Имаме четири бода, но мора да бидеме внимателни. Наша прва задача е Олимписките игри во 2020 година. Нема да биде лесно, но многу селекции го сакаат само тоа. Утре играме против Македонија и тоа нема да биде воопшто лесен меч. Не смее да се задоволиме со овие четири бода кои ги имаме. Сега мора да го задржиме ритамот. Како тренер, мора да барам повеќе. Кога нашата цел е повисока, тогаш мора и повеќе да дадеме. Постои место за напредок во играта. Мора да бидеме цврсти во одбраната. Нема да ни биде лесно против Македонија, тие го имаат Кирил Лазаров“, вели Червар.
Хрватска имаше дури 19 загубени топки на мечот против Јапонија, но тоа не беше проблем да стигнат до победа од 35:27. Сепак, Червар знае дека такво нешто не смее да им се повтори за мечот против Македонија.
