Викендов може да се случи испишување на историја во италијанската Серија А, и тоа доколку на мечот Милан – Фиорентина заигра мегаталентот Франческо Камарда.
Росонерите имаат проблеми во нападот, за дуелот со Виолетовите нема да може да играат суспендираниот Оливие Жиру и повредените Рафаел Леао и Ноа Окафор, па веројатно Лука Јовиќ ќе треба да бие стартер, а можно е во составот да биде повикан Камарда, кој е роден 2008 година. Камарда тренира со првиот тим, а ако влезе во игра в сабота, ќе стане најмладиот фудбалер што дебитирал во Серија А.
Актуелниот рекорд го држи Видсом Ами, кој за Болоња заигра со 15 години и 277 дена, а Камарда задутре ќе биде помлад за 13 дена и ќе има 15 години и 264 дена.
Камарда стана познат по тоа што даде 500 гола на 100 меча за Милан во младинските категории, а сезонава на два меча постигна три гола во јуниорската Лига на шампиони, каде што игра против момчиња кои се по 3-4 години постари од него. Особено се памети голот со ножички против ПСЖ.
