Каков ден за некогашниот капитен на младинската фудбалска репрезентација Владимир Димитровски. Во препладневните часови, поради повредата на грбот, популарниот Дади официјално стави крај на играчката кариера, а сега следува уште една новост.
Димитровски неодамна тргна и во тренерските води, и тоа како дел од Академијата на грчкиот гигант Олимпијакос на островот Крф. Сега, пред него е нов поголем предизвик. Веќе е јасно дека тој ќе биде дел од стручниот штаб на Илчо Ѓорѓиески, кој е промовиран во главен тренер во екипата на Каламата.
Каламата е клуб кој сезонава се натпреварува во втората Супер лига југ во Грција и моментно е на седмото место на табелата, но има само една победа во последните пет кола.
Според најавите од Грција, Каламата со македонскиот тренерски двоец утре и официјално ќе потпише соработка, а за в сабота е закажана презентацијата на тандемот Ѓорѓиески-Димитровски.
