Бразилскиот фудбалер Дани Алвес сè уште се наоѓа во затвор во Барселона откако беше обвинет за силување од страна на 23-годишна девојка, а затворениците за шпанските медиуми откриваат како тој го поминува времето.
Алвес се наоѓа во затворот Брианс 2, а еден од затворениците даде изјава за весникот „Марка“ и откри што прави фудбалерот. Затвореникот открил дека фудбалерот конечно малку се релаксирал и во четвртокот дури играл фудбал со останатите затвореници за време на слободното време во затворскиот двор.
Поранешниот фудбалер на Барселона беше обвинет од 23-годишна девојка дека сексуално ја злоставувал во ноќен клуб во Барселона во последните денови од 2022 година. Алвес при давањето на исказот во полиција дури трипати ја менувал приказната и поради тоа обвинителите побарале тој да биде притворен сè до почетокот на судењето.
Судијата го прифатил барањето и притоа ја одбил можноста Алвес да плати кауција и да се брани од слобода бидејќи постоеле сомнежи дека тој би можело да избега во Бразил.
Алвес потоа го сменил адвокатот и вложил жалба на одлуката за притвор.
