Репрезентацијата на Данска без никакви проблеми се пласира во полуфиналето на Светското ракометно првенство откако со убедливи 33:21 славеше над Бразил. Со оваа победа Данците само потврдија зошто се главни фаворити за златниот медал и петти пат во шестиот натпревар на Мундијалот победува со двоцифрена предност.
Уште од самиот почеток Данците започнаа силовито и само по 15 минути игра имаа убедлива предност од 10:3. До крајот на првиот дел Бразилците успеаја да намалат на три разлика (15:12), но тоа беше само „лажна надеж“.
Вториот дел започна со два гола на Данска, а како што изминуваше времето, така разликата се зголемуваше. За првпат фавритот стигна до двоцифрена предност со 28.18 и до крајот единствената дилема беше конечниот резултат.
Данска е селекцијата која трипати по ред го освојува златото на Светското првенство и сега атакуваат по рекорден четврти пат да се најдат на планетарниот трон.
Во последното четвртфинале ќе играат Португалија и Германија, а победникот од овој меч ќе биде ривал на Данска во полуфиналето.
