Поранешниот капитен и легенда на Челзи, Џон Тери, упати остра критика кон модерниот фудбал, признавајќи дека повеќе не ужива во гледањето натпревари. Тој потенцираше дека модерните тактики ја направиле играта здодевна и предвидлива, а навивачите постепено го губат интересот.
Тери ги фокусираше своите критики главно на стилот на игра на водечките тимови, наведувајќи го како пример Манчестер сити и нивната тактика на постојано поседување на топката. Според него, оваа стратегија ги принудува послабите противници да се повлечат длабоко во одбраната, што води до „тактички“ натпревари лишени од емоции и динамика.
„Не седам дома гледајќи фудбал. Веќе не уживам во него“, рече Тери. „Дојдовме до точката каде што гледаме тимови како играат против Манчестер сити со 11-мина играчи зад топката. Досадно е. Сити се обидува да се пробие, но сè е предвидливо и монотоно. Нема шутеви, нема играчи како Еден Азар или Џо Кол за да ја кренат публиката на нозе.“
Тери ја искористи можноста да го пофали алтернативниот проект Балер лига, во кој е вклучен како менаџер. Ова е нова, младински ориентирана футсал лига со нестандардни правила насочени кон повеќе спектакл и динамика. Неговиот тим, „26ерс“, заврши деветти во првото издание на турнирот во Велика Британија, забележувајќи три победи во 11 натпревари.
„Луѓето зад Балер лигата беа едноставно уморни од здодевни тактички натпревари. Тие воведоа правила како на пример: кога ќе ја поминете централната линија, мора да играте напред, а не можете да додавате назад“, објасни тој. „Новата генерација го обожава. Тие сакаат да гледаат динамика и напади. Мислам дека интересот ќе расте, но фудбалот во неговата сегашна форма почнува да им здодева на луѓето“, коментираше Тери.
