Македонскиот репрезентативен голман Столе Димитриевски имаше уште еден блескав меч во дресот на Рајо Ваљекано. На гостувањето кај Лас Палмас, Рајо Ваљекано победи со 1:0, а Димитриевски беше несовладлив на голот на гостите, па дури успеа да одбрани и пенал.
Некогашниот бисер на Барселона, Мунир Ел Хадади шутираше пенал во 34-тата минута, а Димитриевски го одбрани неговиот удар. До крајот на мечот, Столе имаше вкупно шест одбранети шутеви коишто одеа директно кон неговиот гол, плус уште 10-тина одлични интеревенции. Во 90+1 минута, пенал беше досуден и за Рајо, а Бебе победи за триумф од 1:0.
Со одбраните против Лас Палмас, Димитриевски доби одлична оценка од 8.85 и заслужено го доби приматот за најдобар голман во Примера дивисион за десеттото коло. Ова е вторпат сезоната Димитриевски да биде избран за најдобар голман во колото, откако беше во идеалниот тим и во првото коло сезонава.
Според оценките кои ги добија идеалните 11-мина фудбалери за ова коло, единствено Антоан Гриезман има поголема оценка од Димитриевски. Мечот против Лас Палмас беше јубилеен 100-ти дуел на македонскиот голман во шпанската Примера дивисион.
