Патување од пет-шест часа, зависно од превозното средство, е она што претстои за четирите ракометни репрезентации кои синоќа играа на спектаклот во Дизелдорф, на којшто беше поставен светски рекорд по дневна посета.
По 53.586 гледачи ги следеа дуелите Македонија – Франција и Германија – Швајцарија. Денеска нашите ракометари и нивните противници од групата со специјален воз ќе патуваат до германската престолнина. Иако има штрајк на машиновозачите и возовите се ептен редуцирани, сепак направен е исклучок.
Автобусот останува како друга опција која ќе се користи во ситуацијава кога возовите, особено тие што патуваат од еден до друг подалечен град, речиси и да ги нема.
Следниот меч за Македонија е в недела, против Германија. Тимовите попладнево ќе се сместат во Берлин и ќе има доволно време за одмор и подготовка.
