Германецот Антонио Ридигер има мало кинење на мускул во бицепсот на левата нога, објави Реал Мадрид, а тоа значи пауза од две до три недели.
Реал сезонава мака мачи со повредите особено на дефанзивците, а сега останаа само со Алаба кој само што закрепна и се врати по пауза од над една година, па не е во топ натпреварувачки ритам, со Асенсио кој е член на вториот тим на Реал, и Чуамени кој принудно игра позади.
Повредата на Ридигер доаѓа во многу лош момент за Реал, на една недела пред дербито со Атлетико Мадрид, и на 10 дена пред првиот меч со Манчестер сити од 16-финалето во Лигата на шампионите. Реваншот со Сити е на 19-ти февруари во Мадрид и големо прашање е дали Ридигер ќе може да игра барем на тој клучен меч за тимот.
Антонио е еден од дефанзивците кои најдобро се справуваа со Ерлинг Халанд, па неговото отуство ќе биде хендикеп за Реал и олеснување за Норвежанецот.
