Елиф Елмас одигра клучна улога во пласманот на македонската фудбалска репрезентација на Европското првенство, кое ќе биде прво историско појавување на Рисовите на големата фудбалска сцена.
Елиф е горд што ќе ја претставува својата земја на едно големо натпреварување, но смета дека не смее да се застане тука. Неговата цел е со Македонија да оствари нови големи нешта, а ќе го стори тоа само доколку целиот тим максимално се посвети на претстојниот предизвик.
„Секако, чувството е прекрасно да се биде дел од Европското првенство. Свесни сме каков успех постигнавме, но нема да застанеме тука. Сите продолжуваме со напорната работа, како јас, така и останатите играчи и селекторот посакуваме да искачиме нови врвови и се надевам дека ќе успееме. И по победата над Грузија кажав дека не се задоволувам само со пласманот на Европското. Со дел од сегашните репрезентативци дојдовме од У-21 селекцијата со која исто така игравме на едно големо натпреварување, сега ќе се обидеме да ѝ помогнеме на сениорската селекција да направи чекор повеќе во фудбалот. Искресно, во последниве три месеци размислувам само на Европското првенство. Сон на секој фудбалер е да ја претставува својата земја на големата сцена. Откако дојдов во хотелот оставив сè зад себе и фокусиран сум само на задачите кои ми следуваат. Фактот што доаѓаме од мала држава, овој настап е нешто преголемо за нас како и за секој што навива за Македонија, па затоа и тремата е присутна“, изјави Елмас, а потоа се надоврза околу противниците во групата Ц.
„Во претходните квалификации како и во Лигата на нациите се сретнавме со доста квалитетни репрезентации, а самиот настап на ЕП значи дека треба многу да се работи за да се постигнат добри резултати. Треба да докажеме дека не случајно се пласиравме на завршниот турнир. Ако се прашувам јас, сметам дека можеме да оствариме нешто големо, односно да ја поминеме групата. Јас, како и сите други секогаш влегуваме со самодоверба во секој предизвик и целиме на победа, така ќе биде и во натпреварите од групната фаза“, заврши нашиот дијамант.
