Бразилскиот клуб Сао Пауло реши да го промени тренерот. На местото на Аргентинецот Луис Зубелди промовираше друг Аргентинец, многу попознат, а тоа е Ернан Креспо.
Некогашниот аргентински голгетер потпиша договор до 2026 година со Сао Пауло, клуб во којшто има работено и во 2021 година. Во првиот мандат, иако само неколку месеци, Креспо го одведе Сао Пауло до титулата во локалното првенство Паулиста.
Во лоша форма е некогашниот светски клупски првак Сао Пауло, кој има само една победа во последните седум натпревари во бразилското првенство. Тимот моментално е на 14-тото место на табелата, далеку зад лидерот Фламенго. Сепак, Сао Пауло стигна до осминафиналето во Либертадорес купот (пандан на Лигата на шампионите во Европа) и сезоната може да биде спасена.
Креспо последно имаше работено како тренер во Ал-Аин во Обединетите Арапски Емирати. Со овој тим, Аргентинецот ја освои азиската Лига на шампиони во 2024 година.
