Екипата на Еурофарм Пелистер со висока предност од осум гола ќе патува на реваншот во Прешов откако на домашен терен го совлада Татран со 37-29. Битолчани на првиот четврт-финален натпревар од СЕХА-лигата имаа предност во текот на целиот натпревар, освен на почетокот на мечот, кога гостите од Словачка поведоа со 0-1. Еурофарм Пелистер во последниот дел од првото полувреме стигна до највисоки седум гола, најпрво 15-8, а потоа и 17-10. Сепак, пред паузата, Татран се врати во игра и намали на 20-17.
Во второто полувреме долго се одржуваше оваа предност, но кон средината на вториот период гостите успеаја да намалат и на еден разлика, односно 28-27. И тоа беше сè што направија гостите на овој натпревар. Следуваше неверојатна серија на Еурофарм Пелистер од 10-1 за највисоки 37-28. До крајот на мечот Татран постигна уште еден погодок само за да го постави конечниот резултат на овој натпревар, 37-29, за Еурофарм Пелистер.
Ненад Костески со 10 погодоци беше најпрецизен во редовите на битолчани, додека Хенеберг постигна два помалку. Кај гостите најпрецизен беше Касаткин со 9 гола.
Реваншот ќе се одигра во Прешов на 10 април.
