Вкупно девет гола беа постигнати на првите два меча од вечерната понуда во Лигата на шампионите, што е одлична најава за она што нѐ очекува од 21 часот.
Копенхаген двапати имаше водство против Баер Леверкузен, но Фармацевтите со автогол во 91-вата минута се спасија од пораз и на крајот ќе мора да бидат (пре)задоволни и со 2-2.
Ларсон во деветтата минута донесе водство за домашните, а Грималдо со прекрасен гол од слободен удар донесе израмнување во 82-рата минута. Сепак, само пет минути подоцна, Копенхаген повторно дојде во водство, овојпат преку Роберт. Конечните 2-2 ги постави Хаџидијакос со автогол во 91-вата минута откако го смени правецот на топката по ударот на Ечевери.
Бриж беше убедлив и со 4-1 славеше над Монако. Белгијците само за десеттина минути во првиот дел си ја обезбедија победата откако гостите промашија пенал во 10-тата минута.
Тресолди во 32-рата минута донесе водство за Бриж. На 2-0 зголеми Онједика во 39-тата минута, а само четири минути подоцна Ванакен зголеми на 3-0.
Дијакон во 75-тата минута погоди за убедливи 4-0, а почесниот погодок за Монако беше дело на Ансу Фати во 92-рата минута.
