Реал Мадрид ќе се пушти во нов шопинг во претстојниот преоден рок. Зависно од тоа до кога, односно дали првенствата ќе продолжат со сезоната, ќе се одреди и отворањето на летниот транфер прозорец, во кој Кралевите повторно ќе купуваат офанзивец.
Коронавирусот го прекина шампионатот на Ла Лига како и сите останати во Европа, а додека трае суспензијата претседателот Флорентино Перес крои план кој ќе треба да го оствари за да го засили составот на Зинедин Зидан.
На врвот на листата желби е ѕвездата на Ливерпул Садио Мане, за кого наводно Реал е подготвен да потроши околу 160 милиони евра за да го доведе на „Сантијаго Бернабеу“. Мане е еден од главните играчи во тимот на Јирген Клоп и несомнено меѓу најзаслужните за успесите кои ги остварува клубот во изминативе неколку сезони.
Лани беше меѓу тројцата најдобри стрелци во Премиер лигата заедно со Мо Салах и Пјер-Емерик Обамејанг, a оваа сезона Мане повторно блеска со 18 погодоци и 12 асистенции на 38 меча во сите натпреварувања.
