Ракометната репрезентација на Германија вечерва ја оствари најважната победа на Европското првенство, ја совлада Унгарија и е главен фаворит да го освои второто место во групата 1 од главната фаза кое носи во полуфиналето.
Германците ја совладаа Унгарија со 35:28 и се искачија на второто место на табелата со пет бода, додека Унгарија и Австрија имаат по четири, и во последното коло сами ќе си ја кројат судбината. Ако задутре ја совладаат Хрватска, тогаш ќе завршат како втори и во полуфиналето ќе играат против Данска, која е најдобра во групата 2.
Победникот на вечерашниот дуел беше одличен во второто полувреме, откако првиот дел помина во израмнета игра (18:17). Во 39-тата минута, по голот на Кoстер, Германија за првпат дојде до плус четири (23:19), а во 48-мата минута беше 28:22, со што беше јасно кој ќе слави.
Јулијан Кoстер со осум гола беше најдобар кај Германија, додека во редовите на Унгарија, Габор Анчин и Миклош Роста дадоа по шест гола.
