Екипата на Оклахома е незадржлива во НБА-лигата. По 11-ти пат по ред овој тим победува, а овојпат „настрада“ Детроит и тоа со 119:103. Оклахома веќе одамна го има осигурано првото место во Западната конференција, а речиси сигурно ќе биде и најдобар тим воопшто во лигата, по завршување на регуларниот дел.
Шеј Гилџес-Александер повторно беше предводник на тимот. По 48-ми пат сезонава, Гилџес-Александер постигна над 30 поени и не случајно е прв кандидат за МВП во регуларниот дел од сезоната. На овој меч, Гилџес-Александер израмни еден рекорд на Мајкл Џордан.
Вкупно 69 меча по ред, Гилџес-Александер постигнува 20+ поени, нешто што на легендарниот Џордан му успеало во сезоната 1990/91. На оваа листа, сега пред Гилџес-Александер остануваат само Оскар Робертсон, кој 76 меча по ред дават 20+ поени во сезоната 1963/64, а Вилт Чемберлен имал и по 80 натпревари по ред на кој постигнувал 20+ поени, и тоа во сезоните 1961/62 и 1963/64.
Денвер само за 24 часа вторпат загуби на свој терен. Откако во неверојатно драматичен меч вчера беше поразен од Минесота, и тоа по две продолженија, утрово победнички од Денвер си замина и Сан Антонио, кој победи со 113:106.
Кај домаќините го немаше Никола Јокиќ, и тоа по одлука на тренерот Мелоун, кој реши дека српскиот центар има потреба да одмори откако претходната вечер постигна рекордни 61 поен во кариерата.
Победата на Сан Антонио на гости кај Денвер беше едно од изненадувањата. Инаку вкупно се одиграа девет натпревари, а дури на седум победија домашните екипи.
Резултати: Кливленд – Њујорк 124:105, Индијана – Шарлот 119:105, Вашингтон – Сакраменто 116:101, Бостон – Мајами 103:124, Хјустон – Јута 143:105, Далас – Атланта 120:118, Денвер – Сан Антонио 106:113, Оклахома – Детроит 119:103, Лос Анџелес клиперс – Њу Орлеанс 114:98.
