Новак Ѓоковиќ ја продолжува одбраната на титулата на најпрестижниот тениски турнир, Вимблдон, откако во четвртфинале со 3-1 во сетови го елиминира рускиот тенисер Андреј Рубљов.
Ѓоковиќ по два часа и 48 минути игра славеше со 4:6,6:1,6:4,6:3 против Рубљов и по 12-ти пат обезбеди пласман во полуфиналето на Вимблдон. Новак по 46-ти пат ќе игра во едно гренслем-полуфинале, со што се израмни со Роџер Федерер.
Тој за пласман во финалето ќе игра против Јаник Синер, кој исто така во четири сета со 6:4,3:6,6:2,6:2 го елиминира Роман Сафиулин од Русија.
Рубљов првиот сет го доби благодарение на брејкот во деветтиот гем. Загубениот сет претставуваше повик за будење за Ѓоковиќ и српскиот тенисер одговори на најдобар можен начин. Вториот сет го доби со убедливи 6:1, а во третиот доволен му беше еден брејк за да поведе со 2-1 во сетови. Во четвртиот сет, Ѓоковиќ двапати го одзеде сервисот на противникот и се пласира во полуфиналето.
