Ватерполистите на Србија се освојувачи на Светската лига, откако во финалето, по голема неизвесност и борба ја победија Хрватска со 12:11. Дуелот кој се играше во Белград, изобилуваше со многу пресврти, а на крајот домаќините се радуваа.
Хрватска одлично започна и по првата четвртина водеше со 3:1, а потоа стигна и до 4:1. Сепак, Србија не се предаде. Полека ја намалуваше предноста на противникот и во последната четвртина се влезе во драматична завршница. „Коцкестите“ водеа со 9:8, кога на четири и пол минути пред крајот, Душан Мандиќ даде неверојатен погодок за израмнување.
Хрватите поведоа со 10:9, но потоа следеа два гола на Филип Филиповиќ и Србија поведе со 11:10.
Следуваше ново израмнување на 11:11, кога Вукичевиќ беше прецизен за гостите, а на 15 секунди пред крајот беше досуден петерец на Србија, а сигурен реализатор беше Филиповиќ, за победа и светска титула на Србија.
