Блејк Грифин се врати триумфално во Лос Анџелес и одигра маестрален меч против Клиперс, зачинет со 44 поени, за победа на Детроит пистонс од 109:104.
Крилото на Детроит си поигруваше со своите поранешни соиграчи, а му се одмазди на сопственикот на Клиперс, Стив Балмер за таинствениот начин на кој беше разменет во новиот клуб.
Грифин објави при заминувањето во Детроит дека воопшто не бил информиран за трампата и дека на некој начин бил изманипулиран од Балмер. Со него не се поздрави, но затоа доби овации од навивачите на Клиперс при претставувањето на почетните петорки.
И потоа почна со танцот на паркетот во „Стејплс центар“, а неговите поранешни клупски колеги немоќно ја следеа извонредната партија зачинета со 44 поени. Одличен беше и центарот на гостите Андре Драмонд со 20 поени и 21 скок, Реџи Булок погоди две клучни тројки во финишот, доволно за 18-та победа на Детроит и 18-ти пораз за Клиперс.
Тоа беше и единствената победа на гостинска екипа во осумтте натпревари во НБА лигата.
Резултати: Детроит – Л.А. Клиперс 104:109, Мајами – Мемфис 112:108, Орландо – Бостон 105:103, Минесота – Њу Орлеанс 110:106, Оклахома – Сан Антонио 122:112, Феникс – Денвер 102:93, Сакраменто – Шарлот 104:97, Јута – Чикаго 110:102.
