Ерлинг Халанд одлучи да го промени името на дресот на својата норвешка репрезентација пред претстојните квалификациски натпревари за Светското првенство, објави „Дејли меил“. Напаѓачот на Манчестер сити сега ќе го носи своето средно име на задната страна над бројот девет, што значи дека на дресот ќе пишува „Браут Халанд“.
Интересно е што Халанд веќе е познат на „Инстаграм“ под своето целосно име Ерлинг Браут Халанд, а го носеше тоа име и кога постигна неверојатни девет гола за Норвешка на Светското првенство до 20 години во 2019 година.
Сепак, во неговите претходни клубови, Ред Бул Салцбург и Борусија Дортмунд, како и во Манчестер сити, Халанд отсекогаш го носел само своето презиме.
Норвешка е во борба за пласман на Светското првенство кое следната година ќе се игра во САД, Мексико и Канада. Норвешка моментално ја предводи својата квалификациска група со максимум 12 бода од четири натпревари, што значи дека селекцијата има реални шанси да се најде на завршницата.
Следниот предизвик ги очекува на 4 септември, во пријателски натпревар против Финска, по што следува важен квалификациски натпревар против Молдавија на 9 септември.
