Швајцарскиот репрезентативец Гранит Џака најави дека размислува да си замине од Арсенал, клубот во кој моментално настапува. Џака дојде во редовите на „топчиите“ во 2016 година и ја игра третата сезона во лондонскиот премиерлигаш, но мисли дека е време да најде нов предизвик и да направи трансфер во уште подобар тим.
„Многу сум амбициозен и сакам да го направам следниот чекор. Арсенал не треба да биде мојата последна станица во кариерата“, вели Џака кој има 26 години, а претходно има играно за Борусија Менхенгладбах и Базел.
Во 125 меча за Арсенал, Џака досега има дадено 11 погодоци. Тој денеска го одигра целиот меч за Швајцарија во победата на гостувањето кај Грузија од 2:0, во првиот меч од квалификациите за Европското првенство 2020 година.
