Манчестер сити ја продолжи доминацијата во англиската Премиер лига и четврти пат по ред е шампион. Еден од најзаслужните за одличните резултати на Граѓаните е шпанскиот репрезентативец Родри, кој едноставно не знае за пораз. По победата над Вест хем со 3:1, Родри ја продолжи неверојатната низа без пораз во клупски натпреварувања.
Шпанецот од редовите на Граѓаните има 74 меча, во кои нема ниту еден пораз на клупски план. Со овој биланс тој го сруши светскиот рекорд кој беше поставен пред 31 година. Легендарните фудбалери на Милан, Паоло Малдини и Демитрио Албертини, имаа одиграно 73 клупски средби во кои немаа пораз.
Родри сега е нов светски рекордер со 74 средби без пораз. Дури 50 меча во оваа низа се во првенството на Англија, што само покажува колку значи неговото појавување на терен за Сити.
Според прогнозите, цената на Родри на фудбалскиот пазар се проценува на 110 милиони евра. Тој има активен договор со Манчестер сити до јуни 2027 година.
