Екипата на Илинден минимално со 1:0 славеше над Бујковци во дербито на 10. коло регионалната лига на ОФС Гази Баба, натпреварување што е четврто по ранг во македонскиот фудбал. Како што се очекуваше, дербито ги оправда очекувањата. Двете екипи беа мотивирани и ја посакуваа победата, но на крајот домаќините беа тие што се радуваа.
Клучниот момент на мечот се случи во 24 минута кога центарфорот Павел Ангеловски прифати една топка на работ од шеснаесетникот и без многу размислување, биеше силно по земја, а гостинскиот голман само со поглед ја проследи во неговата мрежа, за радост кај домашната публика.
Во второто полувреме Бујковци тргна многу поофанзивно, во обид да стигне до израмнување. Гостите ја имаа иницијативата на теренот, создадоа неколку шанси, но домашната одбрана предводена од искусниот голман Ивица Божиновски успешно се бранеше.
Во финишот на мечот беше највозбудливо. Во 90 минута, поради втор жолт картон, беше исклучен Керим Ибраимов. Гостите од Бујковци максимално притиснаа да стигнат до посакуваниот гол, но последната шанса што ја имаа, заврши со одбрана на Божиновски.
Буквално во последниот напад, голманот Божиновски доби удар во раката и заработи сериозна повреда на прстот (скршеница), па сега сигурно му престои одреден период на пауза.
За Илинден ова беше седма победа по ред и тимот останува на првото место на табелата со 23 бодови, два повеќе од второпласираниот Марино со 21 бодови, додека на третото место е Маџари со 19 бодови. Бујковци по овој пораз остана на 16 бодови.
Во останатите мечеви од ова коло во ОФС Гази Баба: Ускуп 1911 – Гоце Делчев 1:3, Петровец – Дељадровци 1:3, Долно Коњари – Марино 2:5 и Миладиновци – Маџари Солидарност 2:3.
Во следното коло, кое е последно во есенскиот дел ќе играат: Бујковци – Ускуп 1911, Маџари Солидарност – Илинден, Марино – Миладиновци, Инџиково – Долно Коњари и Гоце Делчев – Петровец.
