Втора година по ред, Европската ракометна федерација ги одликува најдобрите играчи за сезоната 2023/24, а со тоа и легендите на овој спорт. Церемонијата за „Куќата на славните“ ќе се одржи на 14 декември, во пресрет на финалето на ЕВРО 2024 во женска конкуренција.
Во „Куќата на славните“ ќе влезат 21 играч, од кои седум се поранешни ракометарки. Меѓу нив е и легендата на македонскиот ракомет, Индира Кастратовиќ, која беше дел од шампионскиот состав на Кометал ЃП и го носеше дресот на македонската репрезентација. Лауреат е и Луминица Дину, голманката на Кометал ЃП.
Во машката конкуренција, ЕХФ одбра 14 имиња. Сите ќе бидат наградени за своите извонредни достигнувања на и надвор од теренот, како и за нивниот севкупен придонес во европскиот ракомет. Тие ќе им се придружат на повеќе од 50 легенди кои беа првично примени во „Куќата на славните“, наградени на инаугуралните „Награди за извонредност на ЕХФ“ во јуни 2023 година.
Меѓу лауреатите за 2024 година се и неодамна пензионираната француска легенда Никола Карабатиќ, Данецот Микел Хансен, но и Хрватот Иван Чупиќ, кој го носеше дресот на Вардар, и Норвежанката Стина Офтедал Дамке, олимписки, светски и европски шампиони.
„Среќни сме што им оддаваме почит на легендите на нашата игра, на наградите за извонредност на ЕХФ. Ова е одлична можност да ги признаеме оние кои оставија траен белег во ракометот, без разлика дали преку нивните извонредни достигнувања или преку нивното влијание врз нашиот спорт на и надвор од теренот. Дополнително, многумина од нив сè уште активно придонесуваат за ракометот, како тренери или како дел од раководството на клубови, со што продолжуваат да го градат своето наследство“, изјави претседателот на ЕХФ, Михаел Видерер.
Список на женски и машки легенди
Голмани
Андреас Тил / Германија
Матс Олсон / Шведска
Дејан Периќ / Србија
Луминита Хутупан-Дину / Романијаж
Лево крило
Герѓо Иванчик / Унгарија
Леви бекови
Никола Карабатиќ / Франција
Микел Хансен / Данска
Кармен Амариеи / Романија
Ања Андерсен / Данска
Средни бекови
Љубомир Врањеш / Шведска
Анди Шмид / Швајцарија
Миа Хермансон-Хегдал / Шведска
Стина Офтедал Дамке / Норвешка
Десни бекови
Фолкер Цербе / Германија
Стафан Олсон / Шведска
Индира Кастратовиќ / Северна Македонија
Марта Манге / Шпанија
Десно крило
Лук Абало / Франција
Иван Чупиќ / Хрватска
Пикер
Игор Вори / Хрватска
Одбранбен играч
Веран Морос / Шпанија
