Тренерот на Интер, Симоне Инзаги, не го криеше своето незадоволство по поразот од 0-1 против Јувентус во „Дербито на Италија“. Според него, тимот не ги искористил доволно добро шансите што ги имал и тоа е клучната причина за неуспехот.
„Чувствуваме жалење и разочарување бидејќи момците играа со храброст и организација, но мораше подобро да ги искористиме нашите шанси. На полувреме требаше да водиме најмалку со 1-0. Во вториот дел не започнавме на ист начин, а во моментот кога повторно почнавме да создаваме шанси, примивме гол од Консеисао. Нема потреба од зборови, туку од повеќе работа бидејќи ова што го правиме засега не е доволно“, изјави Инзаги.
Ова беше втор последовен гостински пораз за Интер откако претходно загуби со 0-3 од Фиорентина, што е дополнителна причина за загриженост на Инзаги.
„Ова е втор последовен пораз на гости, но беше сосема различен од оној во Фиренца. Нема потреба од излишно анализирање – треба да ги спуштиме главите и да работиме понапорно. Мора да ги подобриме резултатите во директните дуели со конкурентите“, додаде стратегот.
Интер сега се фокусира кон следниот клучен натпревар со Наполи, кој може да има големо значење во трката за Скудетото.
„Тоа ќе биде многу важен натпревар, исто како и овој со Јувентус. Но, пред тоа не чекаат мечеви со Џенова и со Лацио. Ова е директен дуел со еден од главните конкуренти и ќе направиме сè за да победиме. Ќе бидеме подобри од ова издание против Јувентус“, сигурен е Инзаги.
