Годинешниот Австралијан опен влезе во историјата на тенисот, како прв гренслем турнир во новата тениска ера (од 1968 година наваму) на кој и кај мажите и кај жените, во четвртфинале има шест или повеќе од првите осум носители.
Некој би рекол турнирот е здодевен, нема големи изненадувања, но затоа пак сега претстојат спектакли, најдобрите ќе се борат за трофејот.
Кај мажите, во четвртфинале се седум од првите осум носители. Го нема само Феликс Оже-Алијасим кој беше седми носител. Во четвртфиналето од тие што не се во топ 8 на светот влезе само Лирнер Тиен кој е 25-ти.
Во женска конкуренција, тука се најдобрите шест на ВТА листата: Арина Сабаленка, Ига Швионтек, Коко Гоф, Аманда Анисимова, Елена Рибакина и Џесика Пегула. Покрај овие шест тенисерки, во четвртфинале се и талентираната Ива Јовиќ, која е 27-ма на ВТА листата, и Украинката Елена Свитолина, која е 12-та.
Инаку кај дамите, од осумте четвртфиналистки, половината се Американки.
