Кошаркарите на Денвер нагетс предводени од Никола Јокиќ во новата сезона продолжија таму каде што застанаа во минатата. Шампионот Денвер на отворањето на новата сезона со 119:107 го совлада ЛА лејкерс во меч во кој блескаше Јокиќ со трипл-дабл.
Пред мечот, на свечена церемонија на кошаркарите на Денвер им беа доделени шампионските прстени, а потоа беше кренато шампионското знаме, по што Јокиќ стапи на сцена.
Ѕвездата на Денвер само во првото полувреме постигна 19 поени, а неговиот Денвер имаше предност од девет поени (63:54). Во третата четвртина, додека Јокиќ одмораше, Лејкерси предводени од Џејмс намалија на минус три, но со враќањето во игра на српскиот кошаркар, работите дојдоа на место и Денвер сезоната ја отвори со победа.
Јокиќ уште на првиот меч во новата сезона оствари трипл-дабл од 29 поени, 13 скока и 11 асистенции и стана петтиот кошаркар кој повеќе од една сезона имал трипл-дабл на првиот меч. Пред него такво нешто им успеало само на Оскар Робертсон, Меџик Џонсон, Џејсон Кид и Расел Вестбрук.
Џамал Мареј со 21 поен и Кентавиус Колдвел-Поуп со 20 поени беа одлични за Денвер, додека кај Денвер се истакнаа Леброн Џејмс со 21, Тарон Принс со 18 и Ентони Дејвис со 17 поени.
Во вториот меч, Феникс санс како гостин славеше со 108:104 против Голден стејт вориорс. Девин Букер со 32 поени и осум асистенции беше најпрецизен кај Сонцата, каде што се истакна и Кевин Дурант со 18 поени и 10 скока, додека кај Воините најдобар беше Стеф Кари со 27 поени.
