Доколку сакате да победите во градско дерби, или да останете непоразен во дуел со Диего Симеоне, тогаш ви треба еден човек – Сантијаго Солари.
Актуелниот тренер на Реал Мадрид во својата играчка и тренерска кариера, нема загубено ниту едно мадридско дерби, а не знае за пораз ниту во дуелите со Симеоне. Затоа во шега, фановите на Јувентус би го земале Солари како советник на Алегри да му го каже рецептот како против Симеоне и „јорганџиите“, кои се ривали на „старата дама“ во осминафиналето од Лигата на шампионите.
Солари е специјалист за градските дербија во Мадрид, без разлика дали го носел дресот на Атлетико или Реал. Како играч, имаше 7 победи и една нерешена, а сега како тренер има победа во единствениот дуел. Солари има и дадено гол за Реал против Атлетико, и за Атлетико против Реал.
Во трите меѓусебни дуели со Симеоне како играч, Солари има две победи и реми, а сега му води 1-0 и во мечевите како тренери. А, кога играа заедно, на два меча за Аргентина, тимот победи.
