Крипто компанијата „Тетер“, позната по својата стабилна валута USDT, понуди околу 1,1 милијарда евра за купување на мнозински удел во Јувентус. Целта е да се преземе 65,4 проценти од уделот во сопственост на „Ексор“, холдинг компанијата на семејството Ањели. Планот е јасен и амбициозен – по преземањето на мнозинскиот удел, би следела јавна понуда за преостанатите акции по иста цена.
Тетер понуди 2,66 евра по акција за уделот на Ексор. Ова би му дало на семејството Ањели исклучително значајна финансиска инјекција. Покрај купувањето, крипто компанијата најави и дополнителни инвестиции од околу една милијарда евра во понатамошниот развој на Јувентус.
Тетер веќе поседува повеќе од десет проценти од акциите на Јувентус, што го прави втор најголем акционер во клубот, веднаш зад Ексор, што дополнително ја зајакнува тежината на понудата. Главен застапник на влегувањето на Тетер во целосната сопственичка структура на Јувентус е извршниот директор на компанијата, Паоло Ардоино. Тој е долгогодишен поддржувач на клубот и постојано ја изразуваше својата желба Јувентус да добие нова, модерна финансиска визија.
Од Ексор многу брзо стигна јасен одговор на оваа понуда, а тоа е дека Јувентус не е на продажба и дека семејството Ањели нема намера да се откаже од контролниот пакет акции. Ова значи дека понудата на Тетер, барем засега е отфрлена и прогласена за неприфатлива. Семејството Ањели сака да ја задржи управувачката контрола врз клубот, без оглед на понудената сума.
Доколку тоа се случи, тоа би бил историски преседан во италијанскиот фудбал. Еден од најтрофејните клубови во Европа би бил во рацете на голема крипто компанија, што означува сосема нова ера на сопственост.
Засега, Јувентус останува под контрола на Ексор, но понудата, која тежи над милијарда евра, покажува колку глобално привлечен Јувентус останува, дури и во време кога не се покажува добро. Последен пат ја освои титулата во Италија пред пет години.
