Јувентус се намачи, но на крајот ја заврши работата на гостувањето кај Верона и ги освои трите бода во мечот од 14-тото коло во Серија А. Старата дама победи минимално со 1:0 благодарение на голот на Моис Кејн во 60-тата минута.
За Јувентус ова е петта победа во низа во Серија А и во сите пет средби нема примено ниту еден гол, што значи дека одбраната станува челична. Последниот гол што Јувентус го прими е во дербито од Милан, кога Дијаз погоди во победата од 2:0 за Росонерите. Тоа значи дека Јувентус веќе 490 минути е со „сува“ мрежа.
За разлика од Јувентус, Верона останува закована на дното на табелата само со пет бода од дури 14 меча. За Верона ова беше седми пораз во низа, со што само се потврдува очајната форма на тимот кој е последен во Серија А.
