„Не смееме да се предадеме. Да не примиме сега шест…“, ги бодреше Серхио Рамос соиграчите по третиот примен гол од Барселона во популарното „Ел Класико“.
Гостите набрзина постигнаа три гола во второто полувреме, Барса само за 23 минути го реши двомечот од полуфиналето на „Копа дел Реј“ со головите на Суарес во 50-тата и во 73-тата минута и со автоголот на Варан во 69-тата минута, па се наѕираше и комплетен дебакл на Реал Мадрид.
Сепак, до уште повисок пораз не дојде, иако имаше да се игра уште дваесеттина минути, а Рамос на некој начин успеа да влијае на соиграчите да не се предадат комплетно и да доживеат бродолм во дуелот со вечниот ривал.
Реал имаше повеќе шанси до првиот погодок на Суарес, примија гол од првиот удар кон нивниот гол, а потоа комплетно се загубија на теренот, по што стигна и сугестијата на Рамос.
Барселона со вкупен резултат од 4-1 успеа да се пласира во шестото финале по ред во шпанскиот куп, а го чека исходот од денешниот реванш-меч меѓу Валенсија и Бетис и противникот кој ќе им биде последна пречка на патот до петтата едноподруго титула во Кралскиот куп.
Дуелот на „Месталја“ ќе се игра од 21 часот, првиот меч во Севилја заврши 2-2, а победникот ќе игра со Барселона на „Бенито Вилјамарин“ во меч за титулата на 25-ти мај.
