Овој викенд ќе биде со златни букви запишан во историјата на бразилскиот Фламенго. За помалку од 24 часа тимот успеа да освои два многу вредни трофеи.
Фламенго синоќа станаа континентални прваци на Јужна Америка откако во финалето, во неверојатен финиш го победија аргентинскиот ривал Ривер плејт. Бразилците дадоа два гола во последните минути од мечот, па негативата од 1:0 ја претворија во победа во 2:1, доволна за освојување на трофејот. Ова беше втор пехар во Либертадорес купот за Фламенго, повторувајќи го успехот од 1981 година.
По освојување на трофејот, фудбалерите на Фламенго се вратија во Бразил и низ улиците на Рио де Жанеиро решија да прослават со илјадници свои навивачи. Улиците во најпопуларниот град во Бразил беа „боени во црвено.
Додека траеше славењето, Фламенго дозна уште една многу убава вест. Без да играат викендов во домашното првенство, станаа прваци и на Бразил. Тоа е дефинитивно откако Гремио го победи Палмеирас со 2:1, па на тој начин Фламенго остана на чело на табелата со недостижни 13 бода пред Палмеирас и Сантос на четири кола до крајот. Шампионскиот пехар во домашното првенство во Фламенго го чекаа од 2009 година, а е вкупно седми во клупската историја.
